دمعة قهر

تعال ياهمي إذا كنت رجال
قابلني في وجهي بقوّه وشجاعه


إلى متى تكسر خفوقي وتحتال
إلى متى تحرم فؤادي شعاعه ؟


كفاك ياهمي بهاذيل واهوال
ياكبرها فيني ولا بي استطاعه


أحمل بلاوي دنيتي فوق الاثقال
يكفيك تحطيم المراد وضياعه ؟


لا ماكفاك اني بدنياي رحال
ولا كفى نهش الزمان وضباعه ؟


وشفايدة عيشه بلا أرض وآمال
وشفايدة كوني بعيني اتساعه ؟


وشفايده نزرع ولا نحصد اثمار
وشفايده ناكل ,, واهلنا بمجاعه ؟؟


خلاص ياهمي حصل فيني زلزال
محتاج للراحه ولو ربع ساعه


ياشينها الدمعه على خد رجال
قالوها ,, واعيد المثل بنصراعه


الدمعه للجنسين في كل الأحوال
دمعة قهر , تغلب قلوب ٍ شجاعه ؟


ماكان ودي اشرح الهم بمثال
غصب ٍ على روحي ترى القلب شاعه ؟


لما اطفحت فيني مكاييل الأكيال
صار الخبر واضح بليّا إذاعه ؟


ياليت همي آدمي كنت بالحال
أقضي على عمره وكلي قناعه


إني قتلت اللي مداهيله غربال
وادفن بلاوي جثته وسط قاعه ؟


مير البلا همي كما قيل دجال
في هالزمن كلنا ضحايا بذراعه