القلب قلبك والمشاعر مشاعرك

القلب قلبك والمشاعر مشاعرك
اجرح وعذب ياحبيبي حلالك

غالي ولو تخطي على القلب عاذرك
سو الذي يرضيك واللي في بالك

خابرني ميت في غرامك وخابرك
تموت في حب التملك وانا لك

ان كنت صاحي مع خيالك اسامرك
وان نمت في حلمي يجيني خيالك

يعني على كيفك وذوقك وخاطرك
اجيك انا كلي وكلي فدا لك

اموووت في غيضك وعقدة نواظرك
واموت في صدك وامووت بوصاالك

واموت في همسك ليا جيت احاورك
وفي دهشتك لا قلت ادور بدالك

واموت لاشع الضيا بأجمل صورك
واغيب معها والتهي في جمالك

وتقول وش رايك واقرب واشاورك
انت الله اعلم وش نهاية دلالك

يااني بموت وبندقن في محاجرك
او يمكن احيا وانهبل في هبالك

وتضحك وتفرج بالسعاده سرايرك
وانا على ضحكة شفايفك هالك

ذوبتني مابين ملحك وسكرك
واهديتني قلبك وروحك وحالك

اقدر جهودك في حبي واقدرك
واسكنك بين الحنايا لحالك

ومني جزيل الشكر والقلب يشكرك
على سموك يالغضي واكتمالك

سبحان من كمل وصوفك وصورك
وخلا مجالي يندمج في مجاملك

إن غبت عني قمت اهوجس وادورك
وانشد عن ديارك واجي واعنالك

وان جيتني برضاك ماجيت مجبرك
يامرحبااا والقلب فز ودعالك

بس انت تكفى دامني صرت شاعرك
ان غاب زولك لايغيب اتصااالك

وتقبلوا فائق ودي واحترامي